Channel News Asia៖ ក្រុមហ៊ុន Huawei របស់ចិនបានចុះហត្ថលេខាលើកិច្ចព្រមព្រៀងមួយ ជាមួយក្រុមហ៊ុន ទូរគមនាគមន៍រុស្ស៊ី MTS ដើម្បីអភិវឌ្ឍប្រព័ន្ធ 5G នៅក្នុងប្រទេសរុស្ស៊ី នៅជំនួបរវាង ប្រធានាធិបតីចិន លោក ស៊ី ជិនពីង និងប្រធានាធិបតីរុស្ស៊ី លោក វ្ល៉ាឌីមៀ ពូទីន ក្នុងទីក្រុងម៉ូស្គូ នៅថ្ងៃពុធសប្ដាហ៍នេះ។
![](https://www.cambodianews.today/wp-content/uploads/2019/05/huawei-manufacturing-unit-1024x576-1024x576.jpg)
សេចក្ដីថ្លែងការណ៍របស់ក្រុមហ៊ុន ទូរគមនាគមន៍រុស្ស៊ី MTS បានបញ្ជាក់ថា កិច្ចព្រមព្រៀងជាក្រុមហ៊ុន Huawei គឺសំដៅទៅលើការអភិវឌ្ឍប្រព័ន្ធបច្ចេកវិទ្យា 5G នៅក្នុងឆ្នាំ២០១៩-២០២០។
គួររំម្លឹកផងដែរថា ការចុះកិច្ចព្រមព្រៀងរវាងក្រុមហ៊ុន Huawei និងក្រុមហ៊ុន ទូរគមនាគមន៍រុស្ស៊ី MTS កើតមានឡើងនៅ ចំពេលដែល ប្រធានាធិបតីអាមេរិកលោក ដូណាល់ ត្រាំ កំពុងអំពាវនាវឱ្យសម្ព័ន្ធមិត្តរបស់ខ្លួន គាំទ្រដល់ការសម្រេចចិត្តរបស់អាមេរិក ឈប់ប្រើប្រាស់បច្ចេកវិទ្យារបស់ Huawei ដូចសហរដ្ឋអាមេរិកដែរ ដោយសំអាងទៅលើលេសចោទបច្ចេកវិទ្យារបស់ Huawei ធ្វើឲ្យប៉ះពាល់ បញ្ហាសន្តិសុខជាតិ ដោយពុំមានអ្វីជាសំអាងនៅឡើយ ទោះបីជា ក្រុមហ៊ុន Huawei បានច្រានចោល ចំពោះការចោទប្រកាន់របស់សហរដ្ឋអាមេរិកក៏ដោយ៕