ក្រុមហ៊ុន​ផលិត​សំលៀកបំពាក់ធំមួយ បាន​បោះទុន​វិនិយោគ ១៥០​លាន​ដុល្លារ សាងសង​រោងចក្រ​កាត់ដេរ​ដ៏ធំ​ នៅ​ប្រទេស​កម្ពុជា​

3027

​ភ្នំពេញៈ ក្រុមហ៊ុន​ផលិត​សំលៀកបំពាក់​ដ៏​ធំ​មួយ​របស់​ប្រទេស​ចិន ឈ្មោះ Shenzhou International Group Holdings បានប្រកាសថា បាន​កំពុងដំណើរការ​សាងសង់​រោងចក្រ​កាត់ដេរ​សម្លៀកបំពាក់​មួ​យ ដែលមាន​តម្លៃ ១៥០​លាន​ដុល្លារ នៅ​រាជធានី​ភ្នំពេញ​

ក្រុមហ៊ុន​នេះ គឺជា​ក្រុមហ៊ុន​ដែល​ផលិត​សំលៀកបំពាក់ ឲ្យ​ទៅ​ក្រុមហ៊ុន​ធំៗ​ដូចជា Nike, Adidas និង Uniqlo ជាដើម​។ ការសាងសង​រោង​ចក្រ​កាត់ដេរ​នៅ​កម្ពុជា របស់​ក្រុមហ៊ុន Shenzhou នឹងចូលរួម​ចំណែក​យ៉ាង​ធំធេង ដល់​គោលនយោបាយ​អភិវឌ្ឍន៍​ឧស្សាហកម្ម​របស់​ប្រទេស​កម្ពុជា ឆ្នាំ​២០១៥-២០២៥​។ ជាមួយនឹង​ការនាំ​ចេញទៅ​ក្រៅប្រទេស​ក្នុង​ទំហំ​ទឹកប្រាក់ ៤៤០ លាន​ដុល្លារ​នៅក្នុង​ឆ្នាំ ២០១៨ ក្រុមហ៊ុន​នេះ​បានក្លាយ​ទៅជា​អ្នក​ផលិត​ធំជាងគេ នៅក្នុង​ប្រទេស​កម្ពុជា ហើយ​មាន​បុគ្គលិក​ខ្មែរ​ជាង ១១.០០០ នាក់​។​

​លោក ហ៊ុន ម៉ា​ណែ​ត អគ្គ​មេបញ្ជាការរង នៃ​កងយោធពល​ខេមរភូមិន្ទ បាន​មានប្រសាសន៍ថា​៖ “​កម្ពុជា​បានក្លាយ​ជា​មូលដ្ឋានគ្រឹះ​ដ៏​ធំ និង​ជោគជ័យ​មួយ​សម្រាប់​ក្រុមហ៊ុន ក្នុង​ការផលិត​សម្លៀកបំពាក់ ឲ្យ​ក្រុមហ៊ុន Nike ។ ភាពជោគជ័យ​របស់​ក្រុមហ៊ុន មិន​ត្រឹមតែ​ផ្តល់​ផលប្រយោជន៍​ដល់​ក្រុមហ៊ុន​ខ្លួនឯង​ប៉ុណ្ណោះ​ទេ ថែមទាំង​រួមចំណែក​ជំរុញ​សេដ្ឋកិច្ចកម្ពុជា និង​បង្កើត​ការងារ​សម្រាប់​ប្រជាជន​កម្ពុជា​ផងដែរ​”​។

​ក្រុមហ៊ុន Shenzhou បាន​ដំណើរការ​នៅក្នុង​ប្រទេស​កម្ពុជា ចាប់តាំងពី​ឆ្នាំ ២០០៥ ហើយ​បច្ចុប្បន្ននេះ បាន​សាងសង​រោងចក្រ​ថ្មី​មួយទៀត​របស់ខ្លួន នៅក្នុង​តំបន់​សេដ្ឋកិច្ច​ពិសេស ស្ថិតនៅក្នុង​រាជធានី​ភ្នំពេញ​។ លោក Mark Griffie ដែលជា​អនុប្រធាន​ក្រុមហ៊ុន Nike បាន​និយាយថា​៖ “​ប្រទេស​កម្ពុជា គឺជា​ប្រទេសមួយ​ដ៏​សំខាន់​សម្រាប់​ក្រុមហ៊ុន Shenzhou និង​ក្រុមហ៊ុន Nike ។ ជាមួយនឹង​រោងចក្រ​ថ្មី​ដែល​កំពុង​ត្រូវបាន​សាងសង់​នៅទីនេះ យើង​សង្ឃឹមថា នឹង​បន្ត​ការរីកចម្រើន​រួមគ្នា នៅក្នុង​ប្រទេស​កម្ពុជា សម្រាប់​រយៈពេល​ជាច្រើន​ឆ្នាំ​ខាងមុខនេះ​ទៀត​”​។

​លោក​បន្តថា​: «​ការដឹកជញ្ជូន​លើកដំបូង​សម្រាប់​ក្រុមហ៊ុន Nike ពី​ក្រុមហ៊ុន Shenzhou នៅ​ប្រទេស​កម្ពុជា គឺ​បាន​ធ្វើឡើង​កាលពី​ឆ្នាំ ២០០៧​។ ចាប់តាំងពី​ការបង្កើតឡើង​កាលពី ១២ ឆ្នាំមុន​មក អាជីវកម្ម​របស់​យើង​រួមគ្នា​នៅ​កម្ពុជា បាន​រីកចម្រើន​យ៉ាងខ្លាំង ហើយ​សព្វថ្ងៃនេះ​មាន​បុគ្គលិក​ជាង ៣ ពាន់​នាក់​នៅ​កម្ពុជា បាន​ផលិត​ផលិតផល​សម្រាប់​ក្រុមហ៊ុន Nike »​។

​រោងចក្រ​ថ្មី​ដែលមាន​តម្លៃ ១៥០​លាន​ដុល្លារ ត្រូវបាន​គេ​រំពឹងថា​នឹងត្រូវ​បញ្ចប់​នៅ​ខែមីនា​ឆ្នាំ ២០២១ ហើយនឹង​បង្កើត​ការងារ​ចំនួន​ប្រហែល ជា​១៧.០០០ កន្លែង​សម្រាប់​ប្រជាជន​កម្ពុជា​៕