ប្រទេសថៃ (Reuters) ៖ នៅរសៀលថ្ងៃអង្គារនេះ ព្រះមហាក្សត្រថៃ ព្រះបាទ មហា វិជ្ជរ៉ាឡុងកន (Maha Vajiralongkorn) បានចេញព្រះរាជក្រឹត្យទទួលស្គាល់លោក ប្រាយុទ្ធ ចាន់អូចា ជានាយករដ្ឋមន្ត្រីថៃទី ២៩ ជាផ្លូវការហើយ បើទោះបីជាសមាសភាពរដ្ឋាភិបាលចម្រុះ នៅមានភាពស្រពិចស្រពិលយ៉ាងណាក៏ដោយ។
សូមបញ្ជាក់ថា ព្រះមហាក្សត្រថៃ ព្រះបាទ មហា វិជ្ជរ៉ាឡុងកន (Maha Vajiralongkorn) ពុំមានព្រះរាជវត្តមាន នៅក្នុងពិធីទទួលស្គាល់នោះទេ។
លោក ប្រាយុទ្ធ ចាន់អូចា បានធ្វើការស្បថស្បែរនៅក្នុងពិធីនោះថា “ខ្ញុំនឹងលើកកម្ពស់បរិយាកាសសន្តិភាព និងឯកភាពនៅក្នុងសង្គម ដោយឈរលើក្ដីស្រឡាញ់ ការឯកភាពជាតិ និងការអធ្យាស្រ័យឱ្យគ្នាទៅវិញទៅមក… ហើយមិនតែប៉ុណ្ណោះ ខ្ញុំក៏សូមសន្យាផងដែរថា នឹងការពារសេចក្ដីថ្លៃថ្នូររបស់ស្ថាប័នរដ្ឋ សាសនា និងរបបរាជានិយម ដែលជាទីស្រឡាញ់របស់ប្រជាជនថៃ”។
នេះគឺជាអាណិតទី២ របស់លោក ប្រាយុទ្ធ ចាន់អូចា ក្រោយពីបានជាប់ឆ្នោតជានាយករដ្ឋមន្ត្រី កាលពីសប្ដាហ៍មុន ដោយទទួលបានសំឡេងគាំទ្រពីសមាជិកសភាចំនួន ៥០០សំឡេង ក្នុងចំណោមសមាជិកសភាសរុប ៧៥០នាក់។ ការជាប់ជានាយករដ្ឋមន្ត្រីអាណត្តិថ្មីនេះ បានលុបលាងឈ្មោះរបស់លោក ពីនាយករដ្ឋមន្ត្រី នៃរដ្ឋាភិបាលយោធា ហើយ៕
