ទីបំផុតតុលាការធម្មនុញ្ញនៅប្រទេសថៃ កាលពីថ្ងៃពុធកន្លងទៅនេះ បានប្រកាសសាលក្រមរបស់ខ្លួន ពាក់ព័ន្ធសំណុំរឿងបំពានច្បាប់បោះឆ្នោត របស់មេបក្សប្រឆាំងមួយរូបគឺលោក ថាណាថន ចងរូងរួងឃីត (Thanathorn Juangroongruangkit) ដោយតុលាការបានសម្រេចថា លោកពិតជាមានទោសដូចការចោទប្រកាន់មែន។
លោក Thanathorn អាយុ ៤០ឆ្នាំ ដែលជាប្រធានគណបក្សនយោបាយថៃឆ្ពោះទៅរកអនាគត (Future Forward) ត្រូវបានតុលាការធម្មនុញ្ញថៃកាត់សេចក្តីថា លោកពិតជាមានទោសកំហុសមែន ដោយសារការកាន់កាប់ភាគហ៊ុនក្នុងក្រុមហ៊ុនព័ត៌មាន V-Luck Media នៅពេលដាក់ពាក្យឈរឈ្មោះធ្វើជាតំណាងរាស្រ្ត សម្រាប់ការបោះឆ្នោតសកលនៅប្រទេសថៃ ដែលបានប្រព្រឹត្តទៅកាលពីខែមីនា ឆ្នាំ២០១៩។ លោក Thanathorn ធ្លាប់បានអះអាងថា លោកបានផ្ទេរភាគហ៊ុនទាំងនោះអស់ទៅហើយ នៅមុនការចាប់ផ្តើមយុទ្ធនាការបោះឆ្នោត។
![](https://www.cambodianews.today/wp-content/uploads/2019/11/thai-opposition-leader-violated-electoral-law.jpg)
គួរជម្រាបថា តាមរយៈសាលក្រមខាងលើ លោក Thanathorn Juangroongruangkit នឹងត្រូវបាត់បង់តួនាទីជាសមាជិកសភា ហើយក៏មិនអាចធ្វើនយោបាយបានទៀតនោះដែរ។ គណបក្ស Future Forward របស់លោក ស្ថិតក្នុងចំណោមសម្ព័ន្ធបក្សប្រឆាំងនៅប្រទេសថៃ ដែលបានចោទប្រកាន់អតីតរដ្ឋាភិបាលយោធាថៃថា បានកែប្រែច្បាប់បោះឆ្នោត ដើម្បីធានាឲ្យលោកនាយករដ្ឋមន្រ្តី ប្រាយុទ្ធ ចាន់អូចា អាចបន្តកាន់តំណែងនៅក្នុងរដ្ឋាភិបាលស៊ីវិលថ្មី។ គណបក្សនេះ ទទួលបានសំឡេងឆ្នោតគាំទ្រច្រើនជាងគេទី ៣ ក្នុងការបោះឆ្នោតកាលពីខែមីនា បន្ទាប់ពីគណបក្ស ភឿថៃ (Pheu Thai) និងគណបក្សផាឡាងប្រាឆារ៉ាត់ (Palang Pracharat)៕