អាមេរិក ចោទ​អ៉ី​រ៉ង់​ថា​ជា​អ្នក​វាយប្រហារ​លើក​ប៉ាល់​ដឹក​ប្រេង​ជប៉ុន​

568

​វ៉ាស៊ីនតោន (BBC)៖ លោក ម៉ៃ​ក៍ ប៉ុ​ម​ប៉េ​អូ (Mike Pompeo) រដ្ឋមន្ត្រីការបរទេស​អាមេរិក បាន​ចោទប្រកាន់​អ៉ី​រ៉ង់ ថា​គឺជា​អ្នក​នៅ​ពីក្រោយ និង​ជា​អ្នកទទួលខុសត្រូវ ចំពោះ​ការវាយប្រហារ​លើ កប៉ាល់​ដឹក​ប្រេង​ជប៉ុន​មួយគ្រឿង និង​ន័​រវេ​ស​មួយគ្រឿង កាលពី​ថ្ងៃទី​១៣ ខែមិថុនា កន្លងទៅនេះ នៅឯ​ឈូង​សមុទ្រ​អូ​ម៉​ង់​។

​ការចោទប្រកាន់​នេះ លោក ម៉ៃ​ក៍ ប៉ុ​ម​ប៉េ​អូ (Mike Pompeo) សំអាង​ទៅលើ ការវិភាគ​ពី​ប្រភេទ​អាវុធ​ដែល គេ​ប្រើប្រាស់​ក្នុងការ​វាយប្រហារ​លើក​ប៉ាល់​ដឹក​ប្រេង​ទាំង​២​គ្រឿង​ខាងលើ​។

​ការវាយប្រហារ​លើ កប៉ាល់​ដឹក​ប្រេង​ជប៉ុន​ឈ្មោះ Kokuka Courageous និង​កប៉ាល់ Front Altair ដែលជា​កម្មសិទ្ធិ​របស់​ន័​រវេ​ស កើតមានឡើង​នៅ​ចំពេល​លោក អា​បេ ស៊ីន​ហ្សូ នាយករដ្ឋមន្ត្រី​ជប៉ុន កំពុង​បំពេញ​ទស្សនកិច្ច​នៅ​ប្រ​ទែស​អ៉ី​រ៉ង់​។​

​សេចក្ដីថ្លែងការណ៍​មួយ ចេញផ្សាយ​នៅ​ថ្ងៃ​សុក្រ​នេះ ដោយ​បេសកកម្ម​ការទូត​អ៉ី​រ៉ង់​ប្រចាំ​អង្គការសហប្រជាជាតិ បានធ្វើការ​ច្រានចោល ចំពោះ​ការចោទប្រកាន់​របស់​ស​ហ​រដ្ឋ​អាមេរិក ដោយ​ទុក​ថា គឺជា​ការអះអាង​គ្មាន​មូលដ្ឋាន​។​

បន្ទាប់ពីអាមេរិកចោទអ៉ីរ៉ង់ ថាជាអ្នកនៅពីក្រោយ អាមេរិក បានបញ្ជូននាវាពិឃាត ប្រដាប់ដោយមីស៊ីលមួយគ្រឿងទៀត ទៅកាន់តំបន់ឈូងសមុទ្រអូម៉ង់ តែថាអះអាងថា គ្មានបំណងបង្កជម្លោះ នៅក្នុងតំបន់មជ្ឈិមបូព៌ានោះឡើយ គឺដើម្បីការពារផលប្រយោជន៍អាមេរិក និងសម្ព័ន្ធមិត្ត ព្រោះសង្រ្គាមជាមួយអ៉ីរ៉ង់ មិនស្ថិតនៅក្នុងផលប្រយោជន៍យុទ្ធសាស្ត្ររបស់យើង ហើយក៏មិនមែនជាផលប្រយោជន៍សម្រាប់សហគមន៍អន្តរជាតិទំាងមូលដែរ។

នាវាពិឃាត ប្រដាប់ដោយមីស៊ីល

​គួរ​រំ​ម្លឹ​ក​ផងដែរ​ថា កាលពី​ថ្ងៃ​១៣ មិថុនា ក្រុម​នាវិក​រាប់សិប​នាក់ នៅលើ​កប៉ាល់ Kokuka និង​កប៉ាល់ Front Altair ត្រូវបាន​ជួយសង្គ្រោះ បន្ទាប់ពី​មាន​ហេតុការណ៍​ផ្ទុះ​ជាច្រើនលើក​បានកើត​ឡើង​។ ការផ្ទុះ​នេះ​ខាងលើនេះ កើតមាន​បន្ទាប់ពី កប៉ាល់​ដឹក​ប្រេង ៤​គ្រឿង រង​ការវាយប្រហារ​នៅឯ​ឈូង​សមុទ្រ នៃ​ប្រទេស​អេ​មី​រ៉ា​ត​អារ៉ាប់​រួម កាលពី​ខែឧសភា កន្លងទៅ រីឯ​សហរដ្ឋអាមេរិក ក៏​ធ្លាប់បាន​ចោទ​អ៉ី​រ៉ង់​ថា ជា​អ្នកប្រព្រឹត្ត​ផងដែរ​៕ ​