លោក គីម ជុង​អ៊ុន និង​លោក ស៊ី ជិន​ពីង បាន​ពិភាក្សាគ្នា​អំពី​អ្វីខ្លះ​?

731

​ប៉េកាំង​៖ មេដឹកនាំ​កូរ៉េខាងជើង លោក គីម ជុង​អ៊ុន និង​ប្រធានាធិបតី​ចិន លោក ស៊ី ជិន​ពីង បាន​ចូលរួម​ក្នុង​កិច្ចប្រជុំ​មួយ​មាន​រយៈពេល​ជាង ៤​ម៉ោង តែ​ពុំទាន់​មាន​សារព័ត៌មាន​ណាមួយ ហ៊ាន​អះអាង​បញ្ជាក់​អ្វី​លម្អិត​នោះទេ​។​

តើ រយៈពេល​៤​ម៉ោង លោក គីម ជុង​អ៊ុន និង​លោក ស៊ី ជិន​ពីង បាន​ពិភាក្សាគ្នា​អំពី​បញ្ហា​អ្វីខ្លះ​?

​ទីភ្នាក់ងារសារព័ត៌មាន​យ៉ុ​ន​ហាប់ បាន​ឲ្យ​ដឹងថា លោក គីម ជុង​អ៊ុន និង​លោក ស៊ី ជិន​ពីង បាន​ជជែក​គ្នា​អំពី​ជំនួប​រវាង លោក គីម ជុង​អ៊ុន និង​ប្រធានាធិបតី​អាមេរិក លោក ដូ​ណា​ល់ ត្រាំ ដែល​ធ្លាប់បាន​និយាយថា វា​អាច​នឹង​កើត មាន​ឡើង​នៅ​ចុងខែ​មករា ឬ​ខែកុម្ភៈ នាពេល​ខាងមុខនេះ​។ ហើយ​អ្នក​ទាំង​២ ក៏បាន​ពិភាក្សាគ្នា អំពី​ការរៀបចំ​យុទ្ធសាស្ត្រ​ថ្មីៗ ដើម្បី​ពង្រឹង​ទំនាក់ទំនង នៃ​ប្រទេស​ទាំងពីរ​ផងដែរ​។​

​ចំណែក​ប្រភព​ការទូត​វិញ​និយាយថា លោក​ស៊ី ជីន​ពីង ពិតណាស់​នាពេលខាងមុខ នឹង​ទៅកាន់​ប្រទេស​កូរ៉េខាងជើង ដែល​នឹងធ្វើ​ឲ្យ​លោក​ស៊ី ក្លាយជា​មេដឹកនាំ​ចិន​ដំបូង​គេ ធ្វើដំណើរ​ទៅកាន់​ប្រទេស​នេះ ចាប់តាំងពី​ឆ្នាំ​២០០៥​មក​។​

​ចំណែក​ប្រភពពី​កាសែត​កូរ៉េខាងត្បូង​MUNHWA ILBO បាន​រាយការណ៍​ថា នាពេល​ថ្មីៗ​នេះ​ថា បណ្ដា​អ្នកទទួលខុសត្រូវ នៃ​ក្រសួងការបរទេស​អាមេរិក បាន​មកជួប​ជាមួយ​បណ្ដា​អ្នកទទួលខុសត្រូវ​កូរ៉េខាងជើង ជាច្រើនលើក នៅ​ទីក្រុង​ហាណូយ ដើម្បី​និយាយ​ពី​ការរៀបចំ ជំនួប​កំពូល​ថ្មី​រវាង​លោក ដូ ណា​ល់​ត្រាំ និង​លោក គីម ជុង​អ៊ុន ដែល​នាំ​ឲ្យ​គេ​គិតថា ការជួបគ្នា​ជាថ្មី​នេះ អាចធ្វើ​នៅ​វៀតណាម​។​

​គួរ​បញ្ជាក់ថា លោក គីម ជុង​អ៊ុន និង​លោកស្រី Ri Sol Ju ជា​ភរិយា ព្រមទាំង​មន្ត្រីជាន់ខ្ពស់​កូរ៉េខាងជើង ជាច្រើនរូប បាន​ចាក​ចេញពី​ទីក្រុង​ព្យុងយ៉ាង តាម​រថភ្លើង​ពិសេស​មួយ កាលពី​ល្ងាច​ថ្ងៃ​ចន្ទ ហើយ​បានមក​ដល់ទី​ក្រុង​ប៉េកាំង នៅ​ថ្ងៃ​អង្គារ ដើម្បី​បំពេញ​ទស្សនកិច្ច រយៈពេល​៤​ថ្ងៃ ពោ​គឺ​រហូតដល់​ថ្ងៃ​ព្រហស្បតិ៍ តប​តាម​ការអញ្ជើញ​របស់លោក ស៊ី ជិន​ពីង​។ នេះ​គឺជា​ដំណើរ​ទស្សនកិច្ច​ជា​លើក ទី​៤ របស់​មេដឹកនាំ​កូរ៉េខាងជើង លោក គីម ជុង​អ៊ុន មកកាន់​ប្រទេស​ចិន​៕