ប្រាក់ចំណេញ​របស់​ក្រុមហ៊ុន Apple នឹង​ធ្លាក់ចុះ​ជិត ៣០ % បើ​ទីផ្សារ​នៅ​ប្រទេស​ចិន ត្រូវ​បិទ​

504

​យោងតាម​ការ​ព្យាករ​របស់​ក្រុមហ៊ុន Goldman Sach ប្រាក់ចំណេញ​របស់​ក្រុមហ៊ុន Apple នឹង​ធ្លាក់ចុះ​ជិត ៣០% បើ​ប្រទេស​ចិន ធ្វើការ​ហាមឃាត់​ផលិតផល​របស់​ក្រុមហ៊ុន Apple ទាំងស្រុង​នោះ​។

​ក្រុមហ៊ុន Apple នឹង​បាត់បង់​ប្រាក់ចំណូល​សុទ្ធ​របស់ខ្លួន ចំនួន ១៥ ពាន់​លាន​ដុល្លារ​ក្នុង​មួយឆ្នាំ​។​

​ការ​ព្យាករ​នេះ​បាន​ធ្វើឡើង ក្រោយពី​ភាព​តានតឹង​ផ្នែក​ពាណិជ្ជកម្ម បាន​កើនឡើង​រវាង​ប្រទេស​អាមេរិក​និង​ប្រទេស​ចិន ដែល កាលពី​ដើមខែ​នេះ​លោក​ប្រធានាធិបតី ដូ​ណា​ល់ ត្រាំ (Donald Trump) បាន​ដំឡើង​ពន្ធ​លើ​ការនាំ​ចូល​របស់​ចិន​ចំនួន ២០០ ពាន់​លាន​ដុល្លារ បន្ទាប់ពី​ការចរចា​បរាជ័យ​។ លើសពីនេះ​ទៀត​លោក ដូ​ណា​ល់ ត្រាំ បានកត់សម្គាល់​ឃើញថា​មាន​សក្តានុពល​ក្នុងការ​បង្កើន​ពន្ធ លើ​ទំនិញ​បន្ថែមចំនួន ៣២៥ ពាន់​លាន​ដុល្លារ​ទៀត ប្រសិនបើ​មិនអាច​ឈានទៅដល់​កិច្ចព្រមព្រៀង​ណាមួយ​នោះទេ​។​

ហើយ​នៅ​សប្តាហ៍​នេះ លោក ដូ​ណា​ល់ ត្រាំ បាន​បង្កើត​មូលដ្ឋានគ្រឹះ សម្រាប់​ការហាមឃាត់​ក្រុមហ៊ុន​ទូរគមនាគមន៍​ចិន Huawei មិន​ឲ្យ​ទទួលបាន​នូវ​គ្រឿងបន្លាស់​ផ្គត់ផ្គង់ ឬ​សេវាកម្ម​ពី​ក្រុមហ៊ុន​អាមេរិក ដូចជា​ក្រុមហ៊ុន Google និង​ក្រុមហ៊ុន Qualcomm ជាដើម​។ សកម្មភាព​ទាំងនេះ​បាន​នាំឱ្យមាន​ការប្រែប្រួល​ទីផ្សារ​ភាគហ៊ុន​យ៉ាងសំខាន់ គឺ​ភាគហ៊ុន​របស់​ក្រុមហ៊ុន​បច្ចេកវិទ្យា បាន​ធ្លាក់ចុះ​ដោយសារតែ​ព័ត៌មាន​នេះ ហើយ​ក្រោយមក​ក៏មាន​ស្ថិរភាព​ឡើងវិញ បន្ទាប់ពី​ការហាមឃាត់ ត្រូវបាន​ពន្យា​ពេល​រយៈពេល​៩០ ថ្ងៃ តែ​ភាគហ៊ុន​របស់​ក្រុមហ៊ុន Apple បាន​ធ្លាក់ចុះ​ជិត ២% កាលពី​ថ្ងៃ​ពុធ​។​

​ការឆ្លើយតប​មួយ ត្រូវបាន​គេ​កំពុង​រំពឹងទុក​ពី​រដ្ឋាភិបាល​ចិន ដែល​អាច​នឹង​ជះឥទ្ធិពល​ខ្លាំង​ជាង​នេះ នៅលើ​ទីផ្សារ​នានា​ក្នុង​ពិភពលោក​។​

​នៅក្នុង​របាយការណ៍​ស្រាវជ្រាវ បានសរសេរថា​៖ “​វិនិយោគិន​បាន​ចោទសួរ អំពី​ការប៉ះពាល់​ផ្នែក​ហិរញ្ញវត្ថុ​របស់​ក្រុមហ៊ុន Apple ប្រសិនបើ​ប្រទេស​ចិន ហាមឃាត់​ផលិតផល​របស់​ក្រុមហ៊ុន Apple លក់​នៅ​ទីនោះ ដើម្បី​ជាការ​សងសឹក ចំពោះ​អាមេរិក​វិញ ដែល​បានធ្វើ​មកលើ​ក្រុមហ៊ុន Huawei”​។​

​ក្រៅពី​ជម្លោះ​ពាណិជ្ជកម្ម ក្រុមហ៊ុន Apple កំពុង​ប្រឈមមុខ​នឹង​ការលំបាក​យ៉ាងខ្លាំង សម្រាប់​ទីផ្សារ​នៅក្នុង​ប្រទេស​ចិន ដោយសារតែ​តម្រូវការ​ទូរស័ព្ទ​រប​ស់​ក្រុមហ៊ុន Apple បាន​ធ្លាក់ចុះ ស្រប​ពេលដែល​មានការ​ប្រកួតប្រជែង​កើនឡើង​ពី​ក្រុមហ៊ុន​ផលិត​ស្មា​ត​ហ្វូ​ន​មាន​តម្លៃថោក​សមរម្យ ដូចជា Huawei និង Xiaomi ជាដើម​។ នៅក្នុង​ខែមករា ក្រុមហ៊ុន Apple បានចេញ​នូវ​ការព្រមាន​ផ្នែក​លក់​ដំបូង​របស់ខ្លួន ក្នុង​រយៈពេល​ជាង​មួយ​ទសវត្សរ៍ ដោយ​លើកឡើង​ពី​ការធ្លាក់ចុះ​នៃ​ការលក់ iPhone នៅក្នុង​ទីផ្សារ​ប្រទេស​ចិន​។​

​សម្រាប់​ក្រុមហ៊ុន Apple នឹងមាន​ហានិភ័យ​បន្ថែមទៀត ប្រសិនបើ​ជម្លោះ​ពាណិជ្ជកម្ម​កាន់តែ​កើនឡើង​។ អ្វីដែល​គួរអោយកត់សំគាល់​បំផុត​នោះ​គឺថា រោងចក្រ​ផលិត iPhone ភាគច្រើន​របស់​ក្រុមហ៊ុន គឺ​ស្ថិតនៅ​ក្នុងប្រទេស​ចិន​។​

​របាយការណ៍​ដដែល​នេះ​បាន​និយាយថា​៖ “​ប្រសិនបើ​ចិន​ដាក់​កម្រិត សម្រាប់​ការផលិត iPhone តាម​មធ្យោបាយ​ណាមួយ​នោះ យើង​ជឿថា​ក្រុមហ៊ុន​នឹង​មិនអាច​ធ្វើការ​បង្វែរ​ការផលិត iPhone ទៅ​រោងចក្រ​ស្ថិតនៅ​ខាងក្រៅ​ប្រទេស​ចិន ក្នុងពេល​ឆាប់ៗ​នេះ​ទេ អាចមាន​ផលប៉ះពាល់​អវិជ្ជមាន​ដល់​ក្រុមហ៊ុន Apple ហើយ​ប៉ះពាល់ ដល់​ប្រព័ន្ធ​អេកូ​បច្ចេកវិទ្យា ក៏ដូចជា​ការងារ​នៅក្នុង​ស្រុក​របស់​ចិន ផងដែរ​”៕