“​ពន្ធ​កាត់​ទុក​” ត្រូវបាន​សម្ដេច ហ៊ុន សែន ប្រកាស​លុបចោល

587

​ភ្នំពេញ​៖ សម្ដេច ហ៊ុន សែន នាយករដ្ឋមន្ត្រី​នៃ​កម្ពុជា បានប្រកាស​លុបចោល “​ពន្ធ​កាត់​ទុក​” ១% ដែលនឹង​អាចអនុវត្ត​នៅមុន ឬ​ក្រោយ​បំណាច់​ឆ្នាំ​២០១៩​នេះ នៅ​ចំពោះមុខ​អ្នកវិនិយោគ និង​ធុរកិច្ច​ជន​ជប៉ុន ដែល​បាន​ចូលរួម​សិក្ខាសាលា ស្តីពី​ការវិនិយោគ​នៅ​កម្ពុជា នាទី​ក្រុង​តូ​ក្យូ ប្រទេស​ជប៉ុន នៅ​ព្រឹក​ថ្ងៃទី​២៩ ខែឧសភា​នេះ ដើម្បី​ឲ្យ​កម្ពុជា កាន់តែ​មាន​ភាព​ទាក់ទាញថែមទៀត​។​

​អត្ថបទទាក់ទង៖ ប្រទេស​កម្ពុជា មាន​សក្ដានុពល​សំខាន់ៗ ៤ + សន្តិភាព សម្រាប់​អ្នកវិនិយោគ​

សម្ដេច ហ៊ុន សែន បាន​លើកឡើងថា ប្រទេស​កម្ពុជា កំពុងតែ រីកចម្រើន តាមរយៈ​ការវិនិយោគ​របស់​ក្រុមហ៊ុន មកពី​ប្រទេស​ចិន នៅក្នុង​វិស័យ​ឧស្សាហកម្ម សំណង់ និង​ហេដ្ឋារចនាសម្ព័ន្ធ ប៉ុន្តែ​ប្រទេស​កម្ពុជា នៅតែ​ត្រូវការ ការវិនិយោគ​បន្ថែមទៀត ដើម្បី​ជួយ​ដល់​ដំណើរការ​អភិវឌ្ឍ​សេដ្ឋកិច្ច និង​ប្រទេស ជាពិសេស​នោះ​គឺ ការវិនិយោគ​ពី​ប្រទេស​ជប៉ុន​តែម្ដង​។​

​សិក្ខាសាលា ស្តីពី​ការវិនិយោគ​នៅ​កម្ពុជា

ឆ្លៀត​នៅក្នុង​ឱកាស​នោះ សម្ដេច​តេ​ជោ ហ៊ុន សែន ប្រកាស​លុបចោល “​ពន្ធ​កាត់​ទុក​” ១% ដើម្បី​ទាក់ទាញ​អ្នកវិនិយោគ មក​បោះទុន​រកស៊ី​នៅ​កម្ពុជា ដោយ​ថ្លែងថា​៖ “​ខ្ញុំ​យក​ឱកាស​នេះ​ប្រកាស​ចេញពី​ទីក្រុង​តូ​ក្យូ​ថា ពន្ធ​កាត់​ទុក​១​ភាគរយ ត្រូវបាន​លុបចោល​នៅថ្ងៃនេះ ព្រោះ​ពន្ធ​កាត់​ទុក​វា​ជា​ប្រភេទ​បំណុល ដែល​រដ្ឋ​ទៅ​ខ្ចី​ក្រុមហ៊ុន​ឯកជន​យក​ទុក​។ អាហ្នឹង​(​ពន្ធ​កាត់​ទុក​) ការពិត​វា​ជា​ប្រភេទ​បំណុល​។ អ៊ីចឹង​ឥឡូវ​រដ្ឋាភិបាល​កម្ពុជា មានលទ្ធភាព​ហើយ​មិនចាំបាច់​ទៅ​កាត់​ពន្ធ​ទុក​។ ប៉ុន្តែ​អ្វីដែល​លំបាក​ក្រុមហ៊ុន​ត្រូវការ​បញ្ចេញ​ទុន​ទៅរក​ស៊ី​ផង ហើយ​មួយផ្នែក​ទៀត​យកលុយ​ម​ក​ឲ្យ​រដ្ឋាភិបាល​។​បើសិនជា​ខ្ញុំ​ជា​អ្នករកស៊ី​ក៏​ខ្ញុំ​តវ៉ា​ដែរ ព្រោះ​មិនទាន់បាន​រកស៊ី​ផង មិនទាន់​ដឹង​ចំណេញ​ឬ​ខាត​ផង ត្រូវ​បង់ពន្ធ​អស់​១​ភាគរយ​បាត់​”​។​

អត្ថបទទាក់ទង៖ កម្ពុជា មាន​ចំណុច​ពិសេស ៥​យ៉ាង សម្រាប់​ទាក់ទាញ​អ្នកវិនិយោគ ឲ្យ​មក​មក​បោះទុន​រកស៊ី​

ប្រទេសកម្ពុជា នៅពេលរាត្រី

ក្រៅពី​ការលុបចោល “​ពន្ធ​កាត់​ទុក​” ១% រដ្ឋាភិបាល​នៃ​ប្រទេស​កម្ពុជា និង​ប្រទេស​ជប៉ុន ក៏​កំពុង​បង្កើត​កិច្ចព្រមព្រៀង​ស្តីពី​ពន្ធ​ត្រួតស៊ីគ្នា ដើម្បី​កាត់បន្ថយ​បន្ទុក​ពន្ធ ដល់​ធុរកិច្ច និង​អ្នកវិនិយោគ​ជប៉ុន​ផងដែរ ដើម្បី​ឲ្យ​ពួកគេ​អាចមាន​លទ្ធភាព​បោះទុន​វិនិយោគ​នៅ​កម្ពុជា កាន់តែ​ច្រើនឡើង​បន្ថែមទៀត​៕