គណៈកម្មការអឺរ៉ុប បានបញ្ចប់របាយការណ៍បឋមស្តីពីការផ្អាកប្រព័ន្ធអនុគ្រោះពន្ធ EBA ជាបណ្តោះអាសន្នសម្រាប់កម្ពុជា ហើយកាលពីថ្ងៃទី១២ខែវិច្ឆិកា ឆ្នាំ២០១៩នេះហើយ។
តែទោះបីជាយ៉ាងណាក៏ដោយ សហភាពអឺរ៉ុប បានទុកពេលឲ្យ កម្ពុជា មួយខែទៀត ដើម្បីប្រតិកម្មឆ្លើយតបចំពោះរបាយការណ៍បឋម ស្តីពីលទ្ធផលនៃការស៊ើបអង្កេត ដែលធ្វើឡើងនៅខែកុម្ភៈឆ្នាំ ២០១៩ ក្រោមនីតិវិធីដកហូតបណ្តោះអាសន្ន នូវ ប្រព័ន្ធអនុគ្រោះពន្ធពាណិជ្ជកម្ម អ្វីៗគ្រប់យ៉ាងលើកលែងតែអាវុធ ឬហៅកាត់ថា EBA។
នៅក្នុងសេចក្តីថ្លែងការណ៍ របស់សហភាពអឺរ៉ុប បានសរសេរថា៖ “ដោយអនុលោមតាមវិធានដែលមានចែងនៅក្នុងបទប្បញ្ញត្តិ ស្តីពីគម្រោងអនុគ្រោះពន្ធទូទៅរបស់សហភាពអ៊ឺរ៉ុប បច្ចុប្បន្នកម្ពុជានៅមានរយៈពេលមួយខែទៀត ដើម្បីប្រតិកម្មចំពោះរបាយការណ៍បឋមនេះ។ បន្ទាប់មកគណៈកម្មការអឺរ៉ុប នឹងបញ្ចប់របាយការណ៍ និងធ្វើការសំរេចចិត្តនៅខែកុម្ភៈឆ្នាំ ២០២០ ថាតើត្រូវដក ប្រព័ន្ធអនុគ្រោះពន្ធ EBA របស់កម្ពុជា ជាបណ្តោះអាសន្នឬយ៉ាងណា»។
គួររំម្លឹកផងដែរថា គណៈកម្មការសហភាពអឺរ៉ុប បានប្រកាសពីការចាប់ផ្តើមដំណើរការនីតិវិធីជាផ្លូវការ ដែលអាចនឹងឈានទៅដល់ការព្យួរជាបណ្តោះអាសន្ននូវប្រព័ន្ធអនុគ្រោះពន្ធ EBA ពីប្រទេសកម្ពុជា ចាប់តាំងពីខែកុម្ភៈឆ្នាំ២០១៩មកម្លេះ បន្ទាប់ពីមានការរំលាយគណបក្សប្រឆាំង និងការចាប់ខ្លួនអតីតប្រធានគណបក្សសង្គ្រោះជាតិលោក កឹម សុខា ជាដើម។
ឯកអគ្គរដ្ឋទូតសហភាពអឺរ៉ុបថ្មីប្រចាំនៅកម្ពុជា លោកស្រី Carmen Moreno បានបង្ហាញក្ដីសង្ឃឹមថា កម្ពុជានឹងអាចរក្សាបាននូវ ប្រព័ន្ធអនុគ្រោះពន្ធ EBA ពីសហភាពអឺរ៉ុបនេះ នៅក្នុងជំនួបជាមួយលោក ប្រាក់ សុខុន រដ្ឋមន្ត្រីការបរទេសកម្ពុជា កាលពីថ្ងៃទី ០៨ វិច្ឆិកា។
បើគ្មាន ប្រព័ន្ធអនុគ្រោះពន្ធ EBA អ្នកជំនាញខាងសេដ្ឋកិច្ច បានមើលឃើញថា កម្ពុជា នឹងខាតបង់សាច់ប្រាក់ប្រមាណជា ៦០០លានដុល្លារ (អ្នកខ្លះថា ៧០០លានដុល្លារ) សម្រាប់ការបង់ពន្ធ ទៅលើការនាំទំនិញចេញ ពីប្រទេសកម្ពុជា ទៅកាន់ទីផ្សារសហភាពអឺរ៉ុប ហើយរោងចក្រមួយចំនួន នឹងត្រូវផ្លាស់ប្ដូរទៅកាន់ប្រទេសផ្សេង ដែលមាន ប្រព័ន្ធអនុគ្រោះពន្ធ EBA ដែលនាំឲ្យប្រជាជនខ្មែរ បាត់បង់ការងារ ដោយផ្ទាល់ និងដោយប្រយោល នៅក្នុងវិស័យគាត់ដេរ។
ទោះបីជាយ៉ាងណាក៏ដោយ សម្ដេចតេជោ ហ៊ុន សែន ធ្លាប់បានលើកឡើងថា ទោះបីគ្មាន ប្រព័ន្ធអនុគ្រោះពន្ធ EBA ក៏ប្រទេសកម្ពុជាមិនស្លាប់ដែរ។
- សម្តេចតេជោ ហ៊ុន សែន ឲ្យអន្តរជាតិពិចារណាឱ្យបានច្បាស់ មុននឹងព្យួរ ឬ ដក ភាពអនុគ្រោះ ពីប្រទេសអភិវឌ្ឍន៍តិចតួច
- ការដកប្រព័ន្ធអនុគ្រោះពន្ធ EBA ពីកម្ពុជា នឹងធ្វើឲ្យប៉ះពាល់ ដល់ប្រជាពលរដ្ឋក្រីក្រ ខ្លាំងជាងគេ
- សម្ដេច ហ៊ុន សែន៖ “បើគេដកអាភាពអនុគ្រោះ (EBA) ពីយើង ក៏មិនធ្វើឲ្យយើងស្លាប់ដែរ”
- សម្តេចតេជោ ហ៊ុន សែន មិនបារម្ភរឿងបាត់ EBA ទេ តែបារម្ភរឿងស្ពឹកស្រពន់របស់មន្ត្រីក្នុងការធ្វើការងារ
ក្នុងករណីសហភាពអឺរ៉ុបរកឃើញថា មានការរំលោភគោលការណ៍ ក្នុងអនុសញ្ញាស្តីពីសិទ្ធិមនុស្សនិងសិទ្ធិការងារ ដែលមានចុះក្នុងឧបសម្ព័ន្ធទី ៨ នៃបទបញ្ញត្តិ GSP នោះប្រព័ន្ធអនុគ្រោះពន្ធ EBA របស់កម្ពុជា អាចនឹងត្រូវបានផ្អាក៕
